Staða doktorsnema í sálfræði við sálfræðisvið Háskólans í Reykjavík, við verkefnið "Aðstoð við ákvarðanatöku um meðferðarleið við staðbundnu blöðruhálskirtilskrabbameini", er laus til umsóknar.

Meðferðarleiðir við staðbundnu blöðruhálskirtilskrabbameini hafa mismunandi aukaverkanir. Engin ein meðferð er talin best og getur val á meðferð því valdið karlmönnum streitu og vanlíðan og leitt til ákvörðunar sem ekki er nægjanlega ígrunduð. Markmið rannsóknarinnar er að þróa og prófa gagnvirkt ákvörðunartæki sem veitir upplýsingar og aðstoð við þessa erfiðu ákvörðun sem karlmenn standa frammi fyrir eftir að hafa greinst með staðbundið blöðruhálskirtilskrabbamein. Samkvæmt aðaltilgátu rannsóknarinnar þá munu þátttakendur í meðferðarhópi (í samanburði við viðmiðunarhóp) eiga auðveldara með að taka ákvörðun um meðferðarleið, vera sáttari við þá ákvörðun sem þeir tóku og upplifa minni streitu og kvíða og minna þunglyndi.

Vísindalegt gildi rannsóknarinnar er umtalsvert en ákvörðunartækið er það fyrsta sinnar tegundar á Íslandi sem byggir á gagnvirkri vefsíðu og snýr að ákvarðanatöku um meðferðarleið fyrir karlmenn sem greinst hafa með staðbundið blöðruhálskirtilskrabbamein.

Doktorsneminn mun vinna með hópi íslenskra og erlendra rannsakenda að því að kanna virkni ákvörðunartækisins í slembiraðaðri klínískri rannsókn. Doktorsnemanum er ætlað, í samvinnu við leiðbeinendur, að

• Hafa umsjón með forprófun ákvörðunartækisins,
• Undirbúa og hafa umsjón með framkvæmd slembiröðuðu rannsóknarinnar og
• Meta virkni ákvörðunartækisins.

Einnig mun doktorsneminn skrifa greinar fyrir erlend og innlend tímarit og kynna niðurstöðurnar á erlendum og innlendum rannsóknum. Doktorsnámið mun undirbúa nemann fyrir vísindastörf svo sem háskólakennslu og vísindalegar rannsóknir og önnur mikilvæg störf innan heilsuvísinda.

Umsækjendur þurfa að hafa lokið meistaraprófi í sálfræði eða skyldum fræðigreinum. Umsóknarfrestur er til og með 1.desember 2017og sótt er um á vef HR hér að neðan.

Nánari upplýsingar um stöðuna veita Dr. Heiðdís B. Valdimarsdóttir, prófessor við sálfræðisvið HR og ábyrgðarmaður rannsóknarinnar, (heiddisb@ru.is) og Dr. Birna Baldursdóttir, verkefnisstjóri rannsóknarinnar (birnabaldurs@ru.is).