Skóla- og frístundasvið Reykjavíkurborgar auglýsir stöðu skólastjóra við Engjaskóla lausa til umsóknar.

Frá upphafi skólaársins 2020-2021 verður Engjaskóli annar tveggja grunnskóla fyrir nemendur í 1. – 7. bekk í norðanverðum Grafarvogi. Auk Engjaskóla verður Borgarskóli fyrir nemendur í 1. – 7. bekk og Víkurskóli verður unglingaskóli fyrir nemendur í 8. – 10. bekk. Lögð er áhersla á að þessir þrír skólar séu í nánu samstarfi um framkvæmd og þróun skólastarfs. Nemendur úr Engjahverfi og Staðahverfi á yngsta- og miðstigi munu sækja Engjaskóla. Gert er ráð fyrir að innan skólans verði starfsrækt frístundaheimili og félagsmiðstöð fyrir 10-12 ára nemendur. Skólinn er staðsettur í fallegu umhverfi og framundan eru spennandi tímar við að móta og þróa metnaðarfullt skólastarf í nýjum grunnskóla sem byggir á gömlum merg.

Leitað er að metnaðarfullum einstaklingi sem býr yfir leiðtogahæfileikum og hefur víðtæka reynslu og þekkingu á grunnskólastarfi.

Helstu verkefni og ábyrgð:

Veita skólanum faglega forystu og móta framtíðarstefnu hans í samstarfi við starfsfólk skólans, nemendur, foreldra og aðra skóla í hverfinu, innan ramma laga og reglugerða og í samræmi við aðalnámskrá grunnskóla og stefnu Reykjavíkurborgar.

Stýra og bera ábyrgð á rekstri og daglegri starfsemi skólans.

Bera ábyrgð á starfsmannamálum, s.s. ráðningum, vinnutilhögun og starfsþróun.

Bera ábyrgð á samstarfi aðila skólasamfélagsins.

Menntunar- og hæfniskröfur:

Leyfi til að nota starfsheitið grunnskólakennari.

Viðbótarmenntun í stjórnun eða kennslureynsla á grunnskólastigi.

Reynsla af faglegri forystu á sviði kennslu og þróunar í skólastarfi.

Stjórnunarhæfileikar.

Færni í áætlanagerð og fjármálastjórnun.

Færni til að leita nýrra leiða í skólastarfi og leiða framsækna skólaþróun.

Lipurð og hæfni í samskiptum.

Umsókn fylgi yfirlit yfir nám og fyrri störf, leyfisbréf til að nota starfsheitið grunnskólakennari, greinargerð um framtíðarsýn umsækjanda á skólastarfið, upplýsingar um framsækin verkefni sem umsækjandi hefur leitt og annað er málið varðar.

Ráðið verður í stöðuna frá og með 1. ágúst

Skólastjóri - Engjaskóli