Starf leikskólans Engjaborgar byggir á gildunum vellíðan, virðing og sköpun og einkennist af þeirri trú að öll börn séu hæf, forvitin og virk í eigin námi. Námið fer fram í gegnum leik þar sem lögð er áhersla á þátttöku barna, lýðræðislega starfshætti, sköpun, rannsóknir og samvinnu. Uppeldisstarfið byggir á félagslegri hugsmíðahyggju og sækir jafnframt innblástur til hugmyndafræði Reggio Emilia, þar sem umhverfið, samskipti og hugmyndir barna gegna lykilhlutverki í námi og þroska. Markmið Engjaborgar er að skapa hlýlegt, öruggt og hvetjandi lærdómssamfélag þar sem börn, fjölskyldur og starfsfólk læra og vaxa saman.

Starfið byggir á Menntastefnu Reykjavíkurborgar og þeirri sýn að börn öðlist menntun og reynslu sem gerir þeim kleift að hafa jákvæð áhrif á umhverfi sitt og samfélag.

Helstu verkefni og ábyrgð

Vera faglegur leiðtogi leikskólans og móta framtíðarstefnu hans innan ramma laga, reglugerða, aðalnámskrár og stefnu Reykjavíkurborgar.
Bera ábyrgð á daglegu starfi í leikskólanum.
Skipuleggja foreldrasamstarf í samvinnu við foreldra og starfsmenn.
Hafa yfirumsjón með innra mati á starfi leikskólans og umbótaáætlunum.
Hvetja til þróunar og nýbreytni í leikskólastarfi.
Stýra rekstri leikskólans á grundvelli fjárhagsáætlunar, sýnir ábyrgð, ráðdeild og framsýni í nýtingu fjármuna.
Bera ábyrgð á starfsmannamálum, svo sem ráðningum, vinnutilhögun og starfsþróun.
Skipuleggja tengsl skólans við ýmsa samstarfsaðila.

Hæfniskröfur

Leikskólakennaramenntun og leyfisbréf kennara.
Viðbótarmenntun í stjórnun eða kennslureynsla á leikskólastigi.
Reynsla af stjórnun.
Stjórnunarhæfileikar og vilji til að leita nýrra leiða.
Þekking og reynsla á rekstri, áætlanagerð og fjármálastjórnun.
Hæfni til að byggja upp jákvæða og faglega starfsmenningu.
Lipurð og hæfni í samskiptum.
Sjálfstæði og frumkvæði.
Áhugi og reynsla af að leiða þróunarstarf.
Íslenskukunnátta C1 samkvæmt evrópska tungumálarammanum.

Hreint sakavottorð í samræmi við lög og reglur Reykjavíkurborgar.

Nánari upplýsingar

Umsókn fylgi yfirlit yfir nám og fyrri störf, leyfisbréf til að nota starfsheitið kennari og greinargerð um framtíðarsýn umsækjanda á starf í leikskólanum.

Laun eru samkvæmt samningi Sambands íslenskra sveitarfélaga og Kennarasambands Íslands vegna Félags stjórnenda í leikskólum.

Um er að ræða fullt starf og verður ráðið ótímabundið.

Nánari upplýsingar um starfið veitir Hildur Lilja Jónsdóttir, deildarstjóri á leikskólaskrifstofu skóla- og frístundasviðs, í tölvupósti Hildur.Lilja.Jonsdottir@reykjavik.is eða í síma 863-2871.

Vakin er athygli á stefnu Reykjavíkurborgar um jafnan hlut kynja í störfum og að vinnustaðir endurspegli það margbreytilega samfélag sem borgin er.

Leikskólastjóri - Engjaborg